اخوى سَنَدِى وتُقَاىْ ووقَايْتِى بِتْوقَابَا
مِنْ مِحَنْ الزمن كان جاتنى شايله حُرَابَا
ايدُه بِتَصْبُقُه بى خيره بى تِرْحَابَا
وعينُه مَلانَه تَبْ.. مِىْ بالنفَاقْ كَضَّابَا
بَسِمْتُه بِتَدْهِشَكْ عَكَرْ الزمن يَصْفَابا
كَلِمْتُه تَطَمِنَكْ ويْبرُدْ حَشَا المُنْصَابَا
اِنْ شَافَكْ يِجِيكْ ماهو البِزُوغْ يِتْغَابَا
واِنْ جِيتُو بْيَلاقِيكْ فى بَشَاشْتُو مَهَابا
فى الصَىْ أبْ هَجِيرْ يَلْفَاكَ بى هَبَابه
فى البَلَدْ أبْ عَمَارْ اِيدُه امْ رِويقْ كَبَابَه
بين أصْحَابُه قَمْرَه والعيونْ تِتْشَابَا
عِنْدَ أعْدَاهُ هِيبْةَ ابْ رِسْوَه .. حَابْسَ الغابه
مٌو خَالِفْ وَعَدْ سِيدْ كلْمَةً مُرْتَابَه
ومُو شَدَرَةْ حَرَازَاً حَتْحَتَتْ وَرَتَابَه
اِنْ أدَاكْ بِكِيلْ والعِنْدُو سَتْ يِسْخَابَا
وسِرَّكْ عِنْدُه فى بير ..حَاشَا مَا بِفْشَابا
واصِلْ رِحْمُو ..اِيدُه نَديَه كَابَه سَحَابه
مُو لَوَّامْ ..ولا فى صِحَابُه نَتَّ وعَابَا
رَاشَاىْ للضَعِيفْ .. ضَىْ للحَيَارى ضَهَابا
مَالِكْ نَفْسُه تَبْ واطِيهَا .. شَامّه ترابه
كريم ود مَكْرَمَاتْ .. و(خجيجه) قاريَه كتابا
زَرَعَتْ وكَدَبَتْ .. مااهْمَلَتْ تيرابَا
حَصَدَتْ عيشْ نضِيفْ ..مافيه حَتْ بُتَابَه
شَالَتْ وقسمَّتْ ..مادسَتَّكْ فى جْرَابا
صاحبَكْ كان عَنَتْلُو الدنيا بى نَشَّابا
حفيان تَلْحَقو وتَحَجَا وتَزِيلُّو صِعَابا
تقِيلْ جَبَلْ المُرُّوه المِنْ أكَارِمْ جَابَا
هَمِيماً ايدُه راسيَّه ..وكاسيَّه تِتْغَتَابَا
أخوى ماغَشَتُّو الدنيا ولِبِسْ جُلْبَابَا
عَايق الموبِقَاتْ ماعَدُّو مِنْ أصْحَابَا
ماعَاقَرْ خُمور ماحَمَدَنُّه انْخَابَا
مُو لَوُّانْ كَلامْ ..ماقال قَصيده هَجَابَا
سألتَ غَنى ورحيم ..خيراتو يوتْ مُنْسَابَا
على ( وَدْ بِتْ مصطفى ) والجَنَّه تفْتَحْ بَابَا
وبى دعوات (خجيجه) العندو واصْلَه مُجَابه
يكسيكْ بالسعاده... وفيكَ كلْ أسْبَابا

مصطفي ود الماماور